சண்டை

ஒவ்வொரு சண்டையின்
முடிவிலும் நீயோ நானோ
ஜெயிக்கிறோம்
தோற்று கொண்டேயிருக்கிறது
நம் காதல்!

நதிக்கரையோரம் அமைதியானதொரு இரவு!

நதிக்கரையோரம் அமைதியானதொரு இரவு!
நம்மையும் நதியையும் தவிர
எவருமில்லையென எண்ணியே
நடந்து கொண்டிருந்தோம்...

படித்துறையில் மெல்லிய அலைகள்!
வளைந்த நாணல் புதர்களிடையே 
இரு அன்னப்பறவைகள் கழுத்துகள் உரச
உறங்கிகொண்டிருப்பதை கண்டோம்...

பூனைப்பாதம் எடுத்து வைத்து
விரைந்து அவ்விடத்தைக் கடந்தோம்...

திரும்பி நாம் பார்க்கையில்
நதியில் விழுந்த நிலவின்
பிம்பம் கூட அப்பறவைகளைச் சுற்றியபடி
மிதந்து சென்றததாய் தோன்றியது நமக்கு..

புன்னகைகளைப் பரிமாறிக் கொண்டோம்..
முன்பை விட அழகானது அந்த இரவு!

எக்காலத்துக்கும் பொருந்தும்!!!

அச்சம் தவிர்.


ஆண்மை தவறேல்.

இளைத்தல் இகழ்ச்சி.

ஈகை திறன்.

உடலினை உறுதிசெய்.5



ஊண்மிக விரும்பு.

எண்ணுவ துயர்வு.

ஏறுபோல் நட.

ஐம்பொறி ஆட்சிகொள்.

ஒற்றுமை வலிமையாம்.10



ஓய்த லொழி.

ஔடதங் குறை.

கற்ற தொழுகு.

காலம் அழியேல்.

கிளைபல தாங்கேல்.15



கீழோர்க்கு அஞ்சேல்.

குன்றென நிமிர்ந்துநில்.

கூடித் தொழில் செய்.

கெடுப்பது சோர்வு.

கேட்டிலும் துணிந்துநில்.20



கைத்தொழில் போற்று.

கொடுமையை எதிர்த்து நில்.

கோல்கைக் கொண்டு வாழ்.

கவ்வியதை விடேல்.

சரித்திரத் தேர்ச்சிகொள்.25



சாவதற்கு அஞ்சேல்.

சிதையா நெஞ்சு கொள்.

சீறுவோர்ச் சீறு.

சுமையினுக்கு இளைத்திடேல்.

சூரரைப் போற்று.30



செய்வது துணிந்து செய்.

சேர்க்கை அழியேல்.

சைகையிற் பொருளுணர்.

சொல்வது தெளிந்து சொல்.

சோதிடந் தனையிகழ்.35



சௌரியந் தவறேல்.

ஞமலிபோல் வாழேல்.

ஞாயிறு போற்று.

ஞிமிரென இன்புறு.

ஞெகிழ்வத தருளின்.40



ஞேயங் காத்தல் செய்.

தன்மை இழவேல்.

தாழ்ந்து நடவேல்.

திருவினை வென்றுவாழ்.

தீயோர்க்கு அஞ்சேல்.45



துன்பம் மறந்திடு.

தூற்றுதல் ஒழி.

தெய்வம் நீ என்றுணர்.

தேசத்தைக் காத்தல்செய்.

தையலை உயர்வு செய்.50



தொன்மைக்கு அஞ்சேல்.

தோல்வியிற் கலங்கேல்.

தவத்தினை நிதம் புரி.

நன்று கருது.

நாளெலாம் வினைசெய்.55



நினைப்பது முடியும்.

நீதிநூல் பயில்

நுனியளவு செல்.

நூலினைப் பகுத்துணர்

நெற்றி சுருக்கிடேல்.60



நேர்படப் பேசு.

நையப் புடை.

நொந்தது சாகும்.

நோற்பது கைவிடேல்.

பணத்தினைப் பெருக்கு.65



பாட்டினில் அன்புசெய்.

பிணத்தினைப் போற்றேல்.

பீழைக்கு இடங்கொடேல்.

புதியன விரும்பு.

பூமி யிழந்திடேல்.70



பெரிதினும் பெரிதுகேள்.

பேய்களுக்கு அஞ்சேல்.

பொய்ம்மை இகழ்.

போர்த்தொழில் பழகு.

மந்திரம் வலிமை.75



மானம் போற்று.

மிடிமையில் அழிந்திடேல்.

மீளுமாறு உணர்ந்துகொள்.

முனையிலே முகத்து நில்.

மூப்பினுக்கு இடங்கொடேல்.80



மெல்லத் தெரிந்து சொல்.

மேழி போற்று.

மொய்ம்புறத் தவஞ் செய்.

மோனம் போற்று.

மௌட்டியந் தனைக் கொல்.85



யவனர்போல் முயற்சிகொள்.

யாவரையும் மதித்து வாழ்.

யௌவனம் காத்தல் செய்.

ரஸத்திலே தேர்ச்சிகொள்.

ராஜஸம் பயில்.90



ரீதி தவறேல்.

ருசிபல வென்றுணர்.

ரூபம் செம்மை செய்.

ரேகையில் கனி கொள்.

ரோதனம் தவிர்.95



ரௌத்திரம் பழகு.

லவம் பல வெள்ளமாம்.

லாகவம் பயிற்சிசெய்.

லீலை இவ் வுலகு.

(உ)லுத்தரை இகழ்.100



(உ)லோகநூல் கற்றுணர்.

லௌகிகம் ஆற்று.

வருவதை மகிழ்ந்துண்.

வானநூற் பயிற்சிகொள்.

விதையினைத் தெரிந்திடு.105



வீரியம் பெருக்கு.

வெடிப்புறப் பேசு.

வேதம் புதுமைசெய்.

வையத் தலைமைகொள்

வௌவுதல் நீக்கு.

Courtesy: http://www.tamilkalanjiyam.com/literatures/subramaniya_bharathiyar/miscellaneous_songs.html  

நீ ஒரு அற்புதன்

உன் ஒரு மணி நேர தூக்கத்தை தொலைத்து என் படுக்கையறை சுவரில் சூரியகாந்திகளையும் வண்ணத்துப்பூச்சிகளையும் உயிர்ப்பித்தாய்...

"மலர்கள், பட்டாம்பூச்சிகள், எல்லாம் சரி, தென்றலுக்கு என்ன செய்வாய் அன்பே.." என கேட்டுக்கொண்டே உறங்கிப்போனாய்!

மெலிதாய் ஏறி இறங்கிய உன் ஸ்வாசக்காற்று மெல்ல வருடியது என்னை தென்றலுக்கும் மேலாய்...

ஆங்கொரு நல்ல மழை நாள்!

ஆங்கொரு நல்ல மழை நாளில்


அழகுச் சிறுமி ஒருத்தியைக் கண்டேன்!

கையிலொரு குடை, முகம் நிறைய புன்னகை,

நீர்த்தாரைகளை வேடிக்கை பார்த்தபடி

மழைநிற்க காத்திருக்கிறாள்.

சிந்தையைத் தூண்டியது அவ்வழகு சித்திரம்...



காகித கப்பல்களுடன் பட்டாம்பூச்சி பிடிக்க

தும்பைச்செடியுமாய் செம்மண் நீராடியிருக்கிறது

எனது பால்யம்!



பாதம் நனையாமல் பதவிசாய் பக்கத்து

கடையில் நின்று குடைபிடிக்கிறது

அவளது பால்யம்!



மாங்காய் பத்தைகள், நெல்லிக்காய் சுவைத்து

குச்சி ஐஸ் கைகளில் வழிய ருசித்திருக்கிறது

எனது பால்யம்!



பர்கரை சாஸில் தோய்த்து கோக் சிப்பி

நாசுக்காய் டிஷ்யுவினால் ஒற்றிஎடுக்கிறது

அவளது பால்யம்!



லேடி பர்ட் சைக்கிள் முன்னிருந்த கூடையைக்

கண்டே ஆவென வாய்பிளந்திருக்கிறது

எனது பால்யம்!



வோல்க்ஸ்வகேன் கார்களில் வென்டோவுக்கும்

போலோவுக்கும் வித்தாயசம் தெரிந்திருக்கிறது

அவளது பால்யம்!



சாட் பூட் த்ரீயில் ஆரம்பித்து கல்லா மண்ணா வரை

விரிந்து தட்டாங்கல்லில் முடிந்திருக்கிறது

எனது பால்யம்!



பாம்பர் மேன் முதல் ஆங்ரி பர்ட்ஸ் வரை

அநாயசமாக புகுந்து விளையாடுகிறது

அவளது பால்யம்!



மலைப்பாக இருக்கிறது

அவளின் பால்யத்திற்க்கும்

எனது பால்யத்திற்க்கும்

எத்தனை ஒளி ஆண்டுகள்

தூரம்!!!